Monday, August 22, 2016

අම්මා

දරුවෙකු සමඟ අඟනක් වීදියක කොනේ
පාමින් පුතුව ඇය මුදලක් සිඟනු පෙනේ
රැකියාවක් කලහැකි බව හොඳින් දැනේ
මවු සෙනෙහසද මන්දා ඒ අලෙවි වුනේ

කුඹුරු කාලේ කුලියක් මලියක් කෙරුවා
තුනටිය රිදෙන තුරු වත්තේ දළු නෙලුවා
ඉරිදා පොලේ කීර තම්පලා එලුවා
සිහිවී නුඹව මගෙ නෙත කඳුලැලි සැලුවා

අප්පා නැති පැලේ ලිප ගිනි මොලවන්න
කරුමෙට දැනෙන සාගින්දර නිමවන්න
සිප් නැණ සයුරෙ අප හැමටම කිමිදෙන්න
නුඹ විඳි ගැහැට වචනෙන් බැහැ පවසන්න

නුඹ අද නැතත් මේ කතාව අහන්නට
සිහිනෙන් පෙනෙනවා අම්මේ විටින් විට
මතු බුදු වෙන්න කලියෙන් එක වරක් මට
ඔබෙ ලේ කිරි සුවඳ දෙනවද ඉඹින්නට


No comments:

Post a Comment